15 സ്വതന്ത്ര വ്യാപാര കരാറുകളില്‍ ഒപ്പുവയ്‌ക്കാന്‍ കേന്ദ്ര നീക്കം

ന്യൂഡല്‍ഹി: ആസിയാന്‍ സ്വതന്ത്ര വ്യാപാര കരാറിന്‌ പിന്നാലെ ഓസ്‌ട്രേലിയയുമായും സ്വതന്ത്രവ്യാപാര കരാര്‍ ഒപ്പിടാന്‍ കേന്ദ്രനീക്കം. ഇതുള്‍പ്പെടെ പതിനഞ്ചോളം സ്വതന്ത്രവ്യാപാര കരാറുകളാണ്‌ കേന്ദ്രത്തിന്റെ പരിഗണനയിലുള്ളത്‌. ഓസ്‌ട്രേലിയയില്‍ നിന്ന്‌ ഇറക്കുമതി ചെയ്യുന്ന കാര്‍ഷികോല്‍പന്നങ്ങള്‍ക്ക്‌ 37 ശതമാനമാണ്‌ ഇപ്പോള്‍ തീരുവ ഈടാക്കുന്നത്‌. ഇത്‌ ഇല്ലാതാകുന്നതോടെ രാജ്യത്തെ കാര്‍ഷിക മേഖല പൂര്‍ണമായും തകര്‍ച്ചയിലാകും.
സാമ്പത്തികമാന്ദ്യത്തിന്റെ പശ്ചാത്തലത്തില്‍ കൂടുതല്‍ രാജ്യങ്ങളുമായി സ്വതന്ത്ര വ്യാപാര കരാര്‍ നടപ്പാക്കുകയെന്നതാണ്‌ തങ്ങളുടെ നയമെന്ന്‌ കേന്ദ്രസര്‍ക്കാര്‍ വ്യക്തമാക്കിയിട്ടുണ്ട്‌. ആസിയാന്‍ രാജ്യങ്ങളുമായും കൊറിയയുമായും യു പി എ സര്‍ക്കാര്‍ സ്വതന്ത്രവ്യാപാര കരാറുകള്‍ ഒപ്പുവച്ചിരുന്നു. ഇന്ത്യയും യൂറോപ്യന്‍ യൂണിയനും തമ്മിലും സ്വതന്ത്രവ്യാപാര കരാര്‍ ഉടന്‍ ഒപ്പുവച്ചേക്കും. നവംബര്‍ ആറിന്‌ നടക്കുന്ന ഇന്ത്യ- ഇ യു ഉച്ചകോടിക്കുശേഷം കരാര്‍ പൂര്‍ണരൂപത്തിലെത്തിയേക്കുമെന്നാണ്‌ സൂചന.
2008 ജനുവരി മുതല്‍ നടക്കുന്ന ചര്‍ച്ചകളുടെ വിശദാംശങ്ങള്‍ പുറത്തുവിടാന്‍ കേന്ദ്രസര്‍ക്കാര്‍ തയ്യാറായിട്ടില്ല. ഈ കരാര്‍ നടപ്പാകുന്നതോടെ ഇന്ത്യയിലെ മത്സ്യബന്ധന മേഖലയുടെ തകര്‍ച്ചയും പൂര്‍ണമാവും. ഈ മാസം തന്നെ ജപ്പാനുമായി സ്വതന്ത്രവ്യാപാര കരാര്‍ ചര്‍ച്ചകള്‍ പുനരാരംഭിക്കുമെന്നാണ്‌ കരുതപ്പെടുന്നത്‌.
തെക്കെ അമേരിക്കന്‍ രാജ്യങ്ങളുടെ ബ്ലോക്കായ മെര്‍കോസര്‍, ദക്ഷിണാഫ്രിക്കന്‍ കസ്റ്റം യൂണിയന്‍ എന്നിവയുമായും ചര്‍ച്ചകള്‍ നടന്നുവരികയാണ്‌. അടുത്തിടെ നടന്ന ഇന്ത്യ, ബ്രസീല്‍, ദക്ഷിണാഫ്രിക്ക യോഗത്തില്‍ സ്വതന്ത്രവ്യാപാര കരാര്‍ പുനരാരംഭിക്കാന്‍ തീരുമാനമെടുത്തിട്ടുണ്ട്‌.