അമേരിക്കയില്‍ ഏഴില്‍ ഒരാള്‍ ദാരിദ്ര്യത്തില്‍

ന്യൂയോര്‍ക്ക്‌: സമ്പന്ന രാഷ്‌ട്രമായ അമേരിക്കയില്‍ ഏഴില്‍ ഒരാള്‍ ദാരിദ്ര്യത്തിലെന്ന്‌ സര്‍വെ റിപ്പോര്‍ട്ട്‌. രാജ്യത്തെ ആകെ കടപുഴുകിയ സാമ്പത്തിക പ്രതിസന്ധിയുടെ ബാക്കിപത്രമാണ്‌ ഈ കണക്ക്‌. സാമ്പത്തിക പ്രതിസന്ധി മറികടക്കുന്നതിന്‌ സര്‍ക്കാര്‍ സ്വീകരിച്ച നടപടികളില്ലായിരുന്നുവെങ്കില്‍ ഇതിലും ദയനീയമാകുമായിരുന്നു അമേരിക്കയുടെ സ്ഥിതിയെന്ന്‌ ചുണ്ടിക്കാണിക്കപ്പെടുന്നു.
1960 ന്‌ ശേഷം രാജ്യം അഭിമൂഖീകരിക്കുന്ന ഏറ്റവും മോശമായ സ്ഥിതിവിശേഷമാണ്‌ ഇത്‌. 2009 ല്‍ ദരിദ്രരുടെ എണ്ണം 14.3 ശതമാനമായി വര്‍ധിച്ചു. 43.6 മില്ല്യണ്‍ ജനങ്ങളാണ്‌ ഈ പട്ടികയില്‍ എത്തപ്പെട്ടത്‌. 2008 ല്‍ 13.2 ശതമാനം (39.8 മില്ല്യണ്‍) ജനങ്ങളായിരുന്നു ദരിദ്രരായി ഉണ്ടായിരുന്നത്‌. സാമ്പത്തിക പ്രതിസന്ധിമൂലം മില്ല്യണ്‍കണക്കിന്‌ ജനങ്ങളാണ്‌ തൊഴില്‍ നഷ്ടപ്പെട്ട്‌ തെരുവിലായതെന്ന്‌ സെന്‍സസ്‌ ബ്യൂറോയുടെ 2009 ലെ കണക്കുകള്‍ സംബന്ധിച്ച റിപ്പോര്‍ട്ടില്‍ പറയുന്നു.
ആരോഗ്യ പരിരക്ഷാ പദ്ധതികളില്‍ അംഗമല്ലാത്തവരുടെ എണ്ണവും വര്‍ധിച്ചിട്ടുണ്ട്‌. 2008 ല്‍ 15.4 ശതമാനമായിരുന്നത്‌ 2009 അവസാനത്തോടെ 16.7 ശതമാനമായി ഉയര്‍ന്നു. 50.7 മില്ല്യണ്‍ പേരാണ്‌ ഈ പട്ടികയിലുള്ളത്‌. വിവിധ കമ്പനികള്‍ ജീവനക്കാര്‍ക്ക്‌ നല്‍കിയിരുന്ന ആരോഗ്യ പരിരക്ഷാ പദ്ധതി ആനുകൂല്യം നിര്‍ത്തലാക്കിയതാണ്‌ ഇതിന്‌ പ്രധാന കാരണം.