4 ലക്ഷം സെഡാന്‍ കാറുകള്‍ തിരിച്ചുവിളിക്കുന്നു; ടയോട്ടയുടെ തിരിച്ചുവിളി 10 മില്ല്യണ്‍ വാഹനം

ടോക്കിയോ: ടയോട്ടയുടെ കഷ്ടകാലം തീരുന്നില്ല. വീണ്ടും കാറുകള്‍ കൂട്ടത്തോടെ തിരിച്ചുവിളിക്കാനുള്ള തീരുമാനത്തിലാണ്‌ ടയോട്ട ഇപ്പോള്‍. നാലേകാല്‍ ലക്ഷം സെഡാന്‍ കാറുകളാണ്‌ ഇത്തവണ തിരിച്ചുവിളിക്കുന്നത്‌. ഇതോടെ ഒന്‍പത്‌ മാസത്തിനിടെ കമ്പനി തിരിച്ചുവിളിക്കുന്ന വാഹനങ്ങളുടെ എണ്ണം 10 മില്ല്യണ്‍ ആവുകയാണ്‌.
സ്‌റ്റിയറിംഗ്‌ വീലിലെ പൂട്ട്‌ വീഴുന്നത്‌ സംബന്ധിച്ച പ്രശ്‌നങ്ങളാണ്‌ സെഡാനെ തിരിച്ചു വിളിക്കാന്‍ കമ്പനിയെ നിര്‍ബന്ധിതരാക്കിയത്‌. 4,12,000 സെഡാന്‍ കാറുകളാണ്‌ ലോകത്താകമാനം തിരിച്ചു വിളിക്കുന്നത്‌. ഇതില്‍ ഭൂരിപക്ഷവും അമേരിക്കയിലാണ്‌. 3,73,000 കാറുകള്‍. ഇവിഡെ 39,000 ലക്‌സസ്‌ കാറുകളും തിരിച്ചുവിളിക്കുന്നുണ്ട്‌. കഴിഞ്ഞ ഏപ്രിലില്‍ 6,00,00 സിയേന്ന മിനി വാനുകള്‍ കമ്പനി തിരിച്ചുവിളിച്ചിരുന്നു.
കഴിഞ്ഞ ഒക്‌ടോബര്‍ മുതലാണ്‌ ടയോട്ടയുടെ കഷ്ടകാലം തുടങ്ങിയത്‌. അന്ന്‌ പെഡലിലെ അപാകത പരിഹരിക്കാനായി മാത്രം ട്രക്ക്‌, കാര്‍ എന്നിവ ഉള്‍പ്പെടെ ഏകദേശം 5.3 മില്ല്യണ്‍ വാഹനങ്ങളാണ്‌ കമ്പനിക്ക്‌ തിരിച്ചുവിളിക്കേണ്ടി വന്നത്‌. ഇപ്പോഴത്തെ തിരിച്ചുവിളിയും കൂടിയായപ്പോള്‍ ടയോട്ട തിരിച്ചു വിളിക്കേണ്ടിവന്നത്‌ 10 മില്ല്യണ്‍ വാഹനങ്ങളായി വര്‍ധിച്ചിട്ടുണ്ട്‌.