സഹകരണ നിക്ഷേപ പലിശനിരക്ക്‌ വര്‍ധിപ്പിച്ചു

തിരുവനന്തപുരം: നവംബര്‍ ഒന്നു മുതല്‍ 30 വരെയുള്ള സഹകരണയജ്ഞ കാലയളവില്‍ പ്രാഥമിക സഹകരണസംഘങ്ങള്‍/ബാങ്കുകളില്‍ സ്വീകരിക്കുന്ന എല്ലാ സ്ഥിര നിക്ഷേപങ്ങള്‍ക്കും നിലവിലുള്ള നിരക്കിനേക്കാള്‍ 0.5 ശതമാനം പലിശ വര്‍ധിപ്പിച്ചു നല്‍കാന്‍ ഉത്തരവായി. ഇപ്പോള്‍ ഏതൊരു ബാങ്കിലും നിലവിലുള്ള നിരക്കിനേക്കാള്‍ ഉയര്‍ന്നതാണ്‌ പ്രാഥമിക സഹകരണ ബാങ്കുകളിലെ സ്ഥിര നിക്ഷേപ പലിശ നിരക്ക്‌.
പുതുക്കിയ നിരക്കും നിലവിലുള്ള നിരക്ക്‌ ബ്രാക്കറ്റിലും നല്‍കിയിരിക്കുന്നു. 15 ദിവസം മുതല്‍ 45 ദിവസം വരെ 4.50 (നാല്‌), 46 മുതല്‍ 90 ദിവസം വരെ 5.50 (അഞ്ച്‌), 91 മുതല്‍ 179 ദിവസം വരെ 6.50 (ആറ്‌), 180 മുതല്‍ 364 ദിവസം വരെ 8.50 (എട്ട്‌), ഒരു വര്‍ഷത്തിനുമുകളില്‍ 9.50 (ഒമ്പത്‌). ഈ നിരക്കുകള്‍ക്കു പുറമേ മുതിര്‍ന്ന പൗരന്മാരുടെ സ്ഥിര നിക്ഷേപങ്ങള്‍ക്ക്‌ 0.5 ശതമാനം നിരക്കില്‍ അധിക പലിശയും നല്‍കും.