ന്യൂഡല്‍ഹി: തിരിച്ചറിയല്‍ നമ്പരില്ലാത്ത സി ഡി എം എ (കോഡ്‌ ഡിവിഷന്‍ മള്‍ട്ടിപ്പിള്‍ അക്‌സസ്‌) മൊബൈല്‍ ഫോണുകള്‍ ഇറക്കുമതി ചെയ്യുന്നതിന്‌ കേന്ദ്രസര്‍ക്കാര്‍ വിലക്കേര്‍പ്പെടുത്തി. ഇ എസ്‌ എന്‍ ( ഇലക്‌ട്രോണിക്‌ സീരിയല്‍ നമ്പര്‍), എം ഇ ഐ ഡി ( മൊബൈല്‍ ഇക്വിപ്‌മെന്റ്‌ ഐഡന്റിഫൈര്‍) എന്നിവയൊന്നുമില്ലാത്ത ഇത്തരം ഫോണുകള്‍ ഉപയോഗിച്ചവരെ കണ്ടെത്താനാവില്ലാ എന്നതിനാലാണ്‌ സി ഡി എ ഫോണുകള്‍ക്ക്‌ സര്‍ക്കാര്‍ നിരോധനം ഏര്‍പ്പെടുത്തുന്നത്‌. ഇന്ത്യയില്‍ ഇപ്പോള്‍ നൂറ്‌ ദശലക്ഷം സി ഡി എം എ ഫോണുകള്‍ ഉപയോഗത്തിലുണ്ട്‌. ഓരോ മാസവും പുതുതായി 5.8 ദശലക്ഷം ഉപഭോക്താക്കള്‍ കൂടുന്നുമുണ്ട്‌. ഇത്തരം ഫോണുകള്‍ ചൈന, തായ്‌ലാന്‍ഡ്‌ തുടങ്ങിയ രാജ്യങ്ങളില്‍ നിന്നാണ്‌ ഇന്ത്യയിലേക്ക്‌ വരുന്നത്‌.
തിരിച്ചറിയല്‍ നമ്പരുകളില്ലാത്തതിനാല്‍ ഇത്തരം ഫോണുകള്‍ ഭീകരവാദികള്‍ വ്യാപകമായി ഉപയോഗിക്കുന്നുണ്ട്‌. മുംബൈ ഭീകരാക്രമണത്തില്‍ ഭീകരര്‍ സി ഡി എം എ ഫോണുകളായിരുന്നു ഉപയോഗിച്ചത്‌.
ഡയറക്‌ടറേറ്റ്‌ ജനറല്‍ ഓഫ്‌ ഫോറിന്‍ ട്രേഡ്‌ സി ഡി എം എ ഫോണുകളുടെ ഇറക്കുമതി അടിയന്തരമായി നിരോധിച്ചുകൊണ്ട്‌ ഉത്തരവിറക്കി കഴിഞ്ഞു.
0 comments:
ഒരു അഭിപ്രായം പോസ്റ്റ് ചെയ്യൂ