സൂപ്പര്‍ സേവര്‍ ടിക്കറ്റ്‌ പാക്കേജുമായി എയര്‍ ഇന്ത്യ

നെടുമ്പാശേരി: രാജ്യത്തെ ഏത്‌ ആഭ്യന്തര സെക്‌ടറിലും ഉപയോഗിക്കാവുന്ന സൂപ്പര്‍ സേവര്‍, കോര്‍പറേറ്റ്‌ സൂപ്പര്‍ സേവര്‍ ടിക്കറ്റ്‌ പാക്കേജുകള്‍ എയര്‍ ഇന്ത്യ പ്രഖ്യാപിച്ചു. ഒരാള്‍ക്കു മാത്രം ഉപയോഗിക്കാവുന്ന നാല്‌ ഇക്കോണമി ടിക്കറ്റുകള്‍ അടങ്ങുന്ന കൂപ്പണിനു 41,316 രൂപയാണു നിരക്ക്‌. എട്ടു ടിക്കറ്റുകള്‍ അടങ്ങുന്ന കൂപ്പണിന്‌ 82,632 രൂപയാകും. മൂന്നു മാസമാണു കാലാവധി. നാല്‌ എക്‌സിക്യൂട്ടീവ്‌ ക്ലാസ്‌ ടിക്കറ്റുകള്‍ അടങ്ങിയ കൂപ്പണ്‍ 58,000 രൂപയ്‌ക്കും എട്ടു ടിക്കറ്റുള്ള കൂപ്പണ്‍ 1,14,264 രൂപയ്‌ക്കും ലഭിക്കും.
ആറു മാസം കാലാവധിയുള്ള 12 ഇക്കോണമി ടിക്കറ്റുകളുള്ള കോര്‍പറേറ്റ്‌ സൂപ്പര്‍ സേവര്‍ സ്‌കീമിന്‌ 1,23,948 രൂപയാണു നിരക്ക്‌. എക്‌സിക്യൂട്ടീവ്‌
ക്ലാസിന്‌ ഇത്‌ 1,66,800 രൂപയാകും. വാങ്ങുന്ന സ്‌ഥാപനത്തിലെ ആര്‍ക്കും ടിക്കറ്റുകള്‍ ഉപയോഗിക്കാം. 31 വരെ ടിക്കറ്റുകള്‍ ലഭിക്കുമെന്ന്‌ എയര്‍ ഇന്ത്യ അധികൃതര്‍ അറിയിച്ചു.