കയര്‍ കയറ്റുമതിയിലും വരുമാനത്തിലും വര്‍ധന

കൊച്ചി: രാജ്യത്തു നിന്നുള്ള കയറിന്റെയും കയര്‍ ഉല്‍പ്പന്നങ്ങളുടെയും കയറ്റുമതിയില്‍ 12.5 ശതമാനം വളര്‍ച്ച രേഖപ്പെടുത്തി. വരുമാനത്തിലുള്ള വളര്‍ച്ച 10.51 ശതമാനമാണ്‌. 2009 ഏപ്രില്‍ മുതല്‍ സെപ്‌തംബര്‍ വരെയുള്ള കണക്കാണിത്‌. ആഗോള കയറ്റുമതി വിപണിയില്‍ ഉണര്‍വുണ്ടായതിന്റെ സൂചനയാണിതെന്ന്‌ കയര്‍ ബോര്‍ഡ്‌ അറിയിച്ചു.
ഏപ്രില്‍ മുതല്‍ സെപ്‌തംബര്‍ വരെയുള്ള കയറ്റുമതി 110470 ടണ്ണും ഇതിന്റെ വരുമാനമൂല്യം 351.46 കോടി രൂപയാണ്‌. മുന്‍ വര്‍ഷം ഇതേ കാലയളവിലെ കയറ്റുമതി 98162 ടണ്ണും വരുമാനമൂല്യം 318.02 കോടി രൂപയുമായിരുന്നു. അതേസമയം കയര്‍മാറ്റുകളുടെ കയറ്റുമതിയില്‍ രണ്‌ട്‌ ശതമാനത്തിന്റെ നേരിയ ഇടിവുണ്‌ടായി. എന്നാല്‍ വരുമാനത്തില്‍ മുന്‍ വര്‍ഷത്തെ അപേക്ഷിച്ച്‌ ഏഴ്‌ ശതമാനത്തിന്റെ വര്‍ധന രേഖപ്പെടുത്തി.