കൂടുതല്‍ക്കാലം ജീവിക്കണോ? കേരളത്തില്‍ ജനിക്കണം

ന്യൂഡല്‍ഹി: ജനിക്കുന്നെങ്കില്‍ കേരളത്തില്‍ ജനിക്കണം, അതിനു പറ്റിയില്ലെങ്കില്‍ രാജ്യതലസ്ഥാനമായ ന്യൂഡല്‍ഹിയിലായാലും മതി. എങ്കില്‍ നിങ്ങള്‍ക്ക്‌ കൂടുതല്‍ കാലം ജീവിക്കാം. വെറുതെ പറയുന്നതല്ല. കേന്ദ്രസര്‍ക്കാരിന്റെ ഔദ്യോഗിക കണക്കുകള്‍തന്നെയാണ്‌ ഇക്കാര്യം വ്യക്തമാക്കുന്നത്‌. ദൈവത്തിന്റെ സ്വന്തം നാട്ടില്‍ ജനിച്ചാല്‍ കുറഞ്ഞത്‌ രണ്ട്‌ വര്‍ഷമെങ്കിലും ആയുസ്‌ നീട്ടിക്കിട്ടുമെന്നാണ്‌ കണക്കുകള്‍ പറയുന്നത്‌.
ഇന്ത്യയിലെ പുരുഷന്‍മാരുടെ ശരാശരി ആയുസ്‌ 65.8 വയസാണ്‌. 2001 ല്‍ 63.8 ആയിരുന്നു. 2021 ല്‍ ഇത്‌ 69.8 ആയി ഉയരുമെന്നാണ്‌ കേന്ദ്ര ആരോഗ്യമന്ത്രാലയത്തിന്റെ ഏറ്റവും പുതിയ ഫാമിലി വെല്‍ഫെയര്‍ സ്‌റ്റാറ്റിസ്‌റ്റിക്‌സ്‌ 2009 ല്‍ പറയുന്നത്‌. വനിതകളുടെ ആയുസ്‌ ഇപ്പോഴുള്ള 68.1 വയസില്‍നിന്നും 75.2 വയസായി ഉയരുമെന്നും കണ്ടെത്തിയിട്ടുണ്ട്‌.
രാജ്യത്തെ ശരാശരി ഇതാണെങ്കില്‍ കേരളം വളരെ മുന്നിലാണ്‌. കേരളത്തില്‍ ജനിക്കുന്ന ആണ്‍കുട്ടികള്‍ 75.2 വയസുവരെയും പെണ്‍കുട്ടികള്‍ 78.6 വയസുവരെയും ജീവിച്ചിരിക്കുമത്രേ. ന്യൂഡല്‍ഹിയില്‍ ജനിക്കുന്നവര്‍ക്ക്‌ യഥാക്രമം 73.5, 77.4 വയസുവരെ ആയുസുണ്ടാകും.
പുതിയ കണക്കുകള്‍ ആശ്വാസമേകുന്നത്‌ കേരള ടൂറിസത്തിനാണ്‌. ആയുസ്‌ കൂടുതല്‍ ലഭിക്കുമെങ്കില്‍ ദൈവത്തിന്റെ സ്വന്തം നാട്ടിലേക്ക്‌ പ്രസവിക്കാന്‍ വരുന്നവരുടെ എണ്ണം കൂടാന്‍ സാധ്യതയുണ്ട്‌. ഒരു പ്രസവടൂറിസം പദ്ധതി ആവിഷ്‌കരിക്കാനുള്ള സാധ്യതയാണ്‌ ഇതിലൂടെ കേരള ടൂറിസത്തിന്‌ ലഭിച്ചിരിക്കുന്നത്‌.