അമേരിക്ക വീണ്ടും സാമ്പത്തിക പ്രതിസന്ധിയിലേക്ക്‌?

ന്യൂയോര്‍ക്ക്‌: ഒരുക്കല്‍ വീണശേഷം കരകയറിത്തുടങ്ങിയ അമേരിക്കയില്‍ വീണ്ടും സാമ്പത്തിക പ്രതിസന്ധിയുടെ കാര്‍മേഘം ഇരുണ്ടുകൂടുന്നു. തുടര്‍ച്ചയായി രണ്ടാം മാസവും അമേരിക്കയിലെ ചില്ലറ വ്യാപാരത്തിന്റെ ഗ്രാഫ്‌ താഴേക്ക്‌. കഴിഞ്ഞ ജൂണില്‍ 0.5 ശതമാനത്തിന്റെ കുറവാണ്‌ ഈമേഖലയില്‍ അമേരിക്ക അനുഭവിച്ചത്‌. 2009 ജൂണില്‍ 4.8 ശതമാനം വളര്‍ച്ച നേടിയ സ്ഥാനത്താണ്‌ ഈ തിരിച്ചടി. 2010 മേയ്‌ മാസത്തില്‍ ചില്ലറ വ്യാപാര മേഖല 1.1 ശതമാനത്തിന്റെ തിരിച്ചടി നേരിട്ടിരുന്നു.
കാര്‍ വിപണിയാണ്‌ വന്‍ തിരിച്ചടി നേരിട്ടിരിക്കുന്നത്‌. പെട്രോളിന്റെ ഉപഭോഗവും കഴിഞ്ഞ ജൂണില്‍ കുറവായിരുന്നു. ഇത്‌ ആഭ്യന്തരവിപണയിലും ഫാക്ടറി പ്രവര്‍ത്തനങ്ങളിലും പ്രതികൂല സന്ദേശം നല്‍കിക്കഴിഞ്ഞു.
അതേസമയം ഇലക്‌ട്രോണിക്‌സ്‌, ഹോം അപ്ലൈന്‍സ്‌ വിപണനമേഖലയില്‍ നേരിയ ഉയര്‍ച്ചയും ഉണ്ടായിട്ടുണ്ട്‌. 1.3 ശതമാനത്തിന്റെ വളര്‍ച്ച ഈ മേഖലയിലുണ്ടായപ്പോള്‍ വസ്‌ത്രവിപണിയില്‍ 0.6 ശതമാനം വളര്‍ച്ചയുമുണ്ടായി. എന്നാല്‍ വിനോദോപകരണങ്ങളുടെയും പുസ്‌തകങ്ങളുടെയും വില്‍പനയില്‍ 1.4 ശതമാനം കുറവാണുണ്ടായത്‌. കഴിഞ്ഞ മേയില്‍ 0.3 ശതമാനം വളര്‍ച്ച നേടിയ മേഖലയായിരുന്നു ഇത്‌.