ടയോട്ട യൂറോപ്പിലും ഉത്‌പാദനം നിര്‍ത്തുന്നു

ടോക്കിയോ: പ്രതിസന്ധികള്‍ വിടാതെ പിന്തുടരുന്ന ടയോട്ടയ്‌ക്ക്‌ പുതിയ തിരിച്ചടി. വില്‍പ്പനയില്‍ ഗണ്യമായ കുറവുണ്ടായതോടെ യൂറോപ്പിലെ വിവിധ പ്ലാന്റുകളില്‍ ഉത്‌പാദനം നിര്‍ത്തിവയ്‌ക്കാന്‍ നിര്‍ബന്ധിതരായിരിക്കുകയാണ്‌ അവര്‍. ബ്രിട്ടനിലെയും ഫ്രാന്‍സിലയും പ്ലാന്റുകളിലെ ഉത്‌പാദനം അവര്‍ അവസാനിപ്പിച്ചുകഴിഞ്ഞു. 12 ദിവസത്തേക്കാണ്‌ ഉത്‌പാദനം നിര്‍ത്തിയതെന്നാണ്‌ കമ്പനി വൃത്തങ്ങള്‍ അറിയിച്ചത്‌. അതേസമയം ഉത്‌പാദനം എന്ന്‌ പുനരാരംഭിക്കും എന്ന കാരയത്തില്‍ ഇനിയും വ്യക്തതയില്ല.
കഴിഞ്ഞ കുറേ മാസങ്ങളായി ടയോട്ടയുടെ സ്ഥിതി പരിതാപകരമാണ്‌. എട്ട്‌ മില്ല്യണ്‍ കാറുകളാണ്‌ ടയോട്ടയ്‌ക്ക്‌ വിപണിയില്‍നിന്നും തിരിച്ചുവിളിക്കേണ്ടിവന്നത്‌. കാര്‍ നിര്‍മാണത്തിലെ അപാകത മൂലം അമേരിക്കയില്‍മാത്രം 58 പേര്‍ക്ക്‌ ജീവന്‍ നഷ്ടമായപ്പോഴായിരുന്നു ഇത്‌. ഈ സംഭവം ലോകത്താകമാനം ടയോട്ടയുടെ വില്‍പ്പനയെ പ്രതികൂലമായി ബാധിക്കുകയും ചെയ്‌തു.