വായ്‌പ എഴുതിത്തള്ളാന്‍ അനുമതി

തിരുവനന്തപുരം: സംസ്ഥാനത്തെ പട്ടികജാതി/വര്‍ഗ, പരിവര്‍ത്തിത ക്രൈസ്‌തവ വിഭാഗങ്ങള്‍ സര്‍ക്കാര്‍ വകുപ്പുകള്‍, കോര്‍പ്പറേഷനുകള്‍, സഹകരണ സ്ഥാപനങ്ങളില്‍ നിന്നെടുത്ത വായ്‌പ നിബന്ധനയ്‌ക്ക്‌ വിധേയമായി എഴുതിത്തള്ളാന്‍ അനുമതി നല്‍കി ഉത്തരവായി,
2006 മാര്‍ച്ച്‌ 31 ന്‌ തിരിച്ചടവ്‌ കാലാവധി കഴിഞ്ഞ 25,000 രൂപയില്‍ താഴെയുള്ള വായ്‌പകളില്‍ മുതലും പലിശയും ഉള്‍പ്പെടെ 25,000 രൂപ വരെ സര്‍ക്കാര്‍ വഹിക്കും. ഇതിന്‌ മുകളില്‍ വരുന്ന പലിശ, പിഴപ്പലിശ, മറ്റ്‌ ചെലവുകള്‍ അതത്‌ സ്ഥാപനങ്ങള്‍ എഴുതിത്തള്ളണം. ശേഷിക്കുന്ന തുക വായ്‌പക്കാരന്റെ ബാധ്യതയായിരിക്കും.
25,000 രൂപയ്‌ക്ക്‌ മേലുള്ള വായ്‌പകളില്‍ മുതലും പലിശയും ചേര്‍ത്ത്‌ 25,000 രൂപ വരെ സര്‍ക്കാര്‍ വഹിക്കും. ഇതിന്‌ മുകളിലുള്ള പിഴപ്പലിശയും വായ്‌പ ഈടാക്കാനുള്ള ചെലവും അതത്‌ സ്ഥാപനങ്ങള്‍ എഴുതിത്തള്ളണം.                                         more...

ശേഷിക്കുന്ന തുക വായ്‌പക്കാരന്റെ ബാധ്യതയാവും.
എഴുതിത്തള്ളല്‍ പദ്ധതി പ്രകാരം വായ്‌പക്കാരന്റെ വാര്‍ഷിക വരുമാന പരിധി 1.50 ലക്ഷം രൂപയാണ്‌. 2009 മാര്‍ച്ച്‌ 31 വരെയുള്ള പലിശ സര്‍ക്കാരില്‍ നിന്നുള്ള നഷ്‌ടപരിഹാരത്തിന്‌ കണക്കാക്കും. തീര്‍പ്പാക്കുന്ന വായ്‌പകളില്‍ 2009 ഏപ്രില്‍ ഒന്നിന്‌ ശേഷം പലിശ ഈടാക്കാന്‍ പാടില്ല.
ഇതുവഴിയുള്ള നഷ്‌ടപരിഹാരം മൂന്ന്‌ വര്‍ഷം കൊണ്ട്‌ സര്‍ക്കാര്‍ ബന്ധപ്പെട്ട സ്ഥാപനങ്ങള്‍ക്ക്‌ നല്‍കും. ഒരാളുടെ പേരിലുള്ള ഒരു വായ്‌പമാത്രമേ ഈ പദ്ധതി പരിഗണിക്കൂ.അതത്‌ സ്ഥാപനങ്ങളില്‍ നിന്നും ഈ വിഭാഗം വായ്‌പയെടുത്തവരുടെ വിവരം പട്ടികജാതി/വര്‍ഗ വികസന ഡയറക്‌ടര്‍ മുഖേന ജനുവരി 31 ന്‌ മുമ്പ്‌ സര്‍ക്കാരിന്‌ നല്‍കാനാണ്‌ നിര്‍ദേശം.