ചെറുകാറുമായി നിസാന്‍-ബജാജ്‌ എത്തുന്നു

ന്യൂഡല്‍ഹി: ടാറ്റ നാനോയ്‌ക്കു പിന്നാലെ മറ്റൊരു വിലകുറഞ്ഞ കാര്‍ കൂടി വിപണിയിലേക്ക്‌. റെനോ-നിസ്സാന്‍, ബജാജ്‌ ഓട്ടോയുമായി സഹകരിച്ചാണ്‌ ഈ കാര്‍ പുറത്തിറക്കുന്നത്‌. ഉയര്‍ന്ന ഇന്ധനക്ഷമത വാഗ്‌ദാനം ചെയ്യുന്ന കാര്‍ 2012 ല്‍ വിപണിയിലെത്തുമെന്ന്‌ റെനോ വൃത്തങ്ങള്‍ പറഞ്ഞു.
നാനോ കാറുകള്‍ക്ക്‌ ഇനിയും ഇന്ത്യയില്‍ സാധ്യതയുണ്ടെന്നാണ്‌ റെനോയുടെ കണ്ടെത്തല്‍. പുതിയ സംരംഭത്തിന്റെ പേരും ലോഗോയുമെല്ലാം ഇരുകമ്പനികളും ചര്‍ച്ചചെയ്‌ത്‌ ധാരണയിലാക്കിയിട്ടുണ്ട്‌. രൂപകല്‍പനയും ഉത്‌പാദനവും ബജാജ്‌ ഓട്ടോ നിര്‍വഹിക്കും. വിപണനത്തിന്റെ ചുമതല റെനോ-നിസ്സാനാണ്‌.
അതേസമയം നാനോയുടെ മാര്‍ക്കറ്റ്‌ ലക്ഷ്യമിടുന്ന ഈ കാറിന്റെ വില ഒട്ടും നാനോ ആവില്ലെന്നാണ്‌ സൂചന. 2,500 മുതല്‍ 3000 വരെ ഡോളറായിരിക്കും ഇതിന്റെ വിലയെന്ന്‌ റെനോ വൃത്തങ്ങള്‍ വെളിപ്പെടുത്തി. അതായാത്‌ കുറഞ്ഞപക്ഷം 1.5 ലക്ഷം രൂപയെങ്കിലുമാകും പുതിയ കാറിന്റെ വില.