കൊച്ചിയിലെ ട്രെയ്‌ഡ്‌ സെന്റര്‍ ഒന്നാംഘട്ടം പൊതുമേഖലയില്‍

കൊച്ചി: സംസ്ഥാന വ്യവസായ വികസന കോര്‍പ്പറേഷനും എഫ്‌ എ സി ടിയുംചേര്‍ന്ന്‌ കൊച്ചിയില്‍ ആരംഭിക്കുന്ന ട്രേഡ്‌ സെന്ററിന്റെ ഒന്നാം ഘട്ടം പൊതുമേഖലയില്‍ തന്നെയായിരിക്കുമെന്നും സംസ്ഥാന വ്യവസായവകുപ്പിന്‌ കീഴിലുള്ള മറ്റ്‌ പൊതുമേഖല സ്ഥാപനങ്ങളെകൂടി പദ്ധതിയില്‍ പങ്കാളികളാക്കുമെന്നും വ്യവസായ മന്ത്രി എളമരം കരീം വ്യക്തമാക്കി.
അന്തര്‍ദേശിയ പ്രദര്‍ശനങ്ങളുടെ കേന്ദ്രമായി കൊച്ചിയെ മാറ്റാന്‍ സഹായിക്കുന്ന ഈ പദ്ധതി പൊതുമേഖലാസ്ഥാപനങ്ങള്‍തന്നെ എറ്റെടുക്കണം. മുന്‍വര്‍ഷങ്ങളില്‍ ഒപ്പുവച്ച ആക്കുളം പാര്‍ക്കുപോലുള്ള പല വന്‍പദ്ധതികളും തുടങ്ങാന്‍ കഴിഞ്ഞിട്ടില്ല. വന്‍മുതല്‍മുടക്ക്‌ ആവശ്യമായിവരുന്ന പദ്ധതികളുടെ വിജയസാധ്യത മറ്റ്‌ സംരംഭകരെ ബോധ്യപ്പെടുത്തുന്നതിന്‌ പൊതുമേഖലതന്നെ തുടക്കംകുറിക്കണം.
വിവിധ പദ്ധതികള്‍ക്കായി ഭൂമി ഏറ്റെടുത്തിട്ടും പദ്ധതി തുടങ്ങാത്തവരുടെ യോഗം അടുത്ത്‌ വിളിച്ചുചേര്‍ത്തിരുന്നുവെന്നും പദ്ധതി തുടങ്ങുന്നില്ലെങ്കില്‍ ഭൂമി മടക്കി നല്‍കണമെന്ന്‌ ആവശ്യപ്പെട്ടതായും വ്യവസായ മന്ത്രി പറഞ്ഞു.