കൊച്ചി, തിരുവനന്തപുരം എന്നിവിടങ്ങളിലേക്ക്‌ എയര്‍ ഏഷ്യ സര്‍വ്വീസ്‌ തുടങ്ങുന്നു

കൊച്ചി: എയര്‍ ഏഷ്യ കൊച്ചി, തിരുവനന്തപുരം എന്നിവിടങ്ങളിലേക്ക്‌ ദിനംപ്രതി നേരിട്ടുള്ള സര്‍വീസുകള്‍ ആരംഭിക്കുന്നു. മലേഷ്യയിലെ ക്വാലാലംപൂരില്‍നിന്നുള്ള ഈ സര്‍വ്വീസുകള്‍ നവംബര്‍ മുതല്‍ തുടങ്ങും.
ഈ മാസം 15 മുതല്‍ 20 വരെ ടിക്കറ്റ്‌ ബുക്ക്‌ ചെയ്യുന്നവര്‍ക്ക്‌ 1499 രൂപയാണ്‌ വണ്‍വേ നിരക്കായി എയര്‍ ഏഷ്യ വാഗ്‌ദാനം ചെയ്യുന്നത്‌. കൊച്ചിയില്‍നിന്നും തിരുവനന്തപുരത്തുനിന്നും ഒരേ നിരക്ക്‌ തന്നെയായിരിക്കും. കൊച്ചിയില്‍നിന്നുള്ള യാത്രക്കാര്‍ക്ക്‌                     നവംബര്‍ 12 മുതല്‍ 2010 ജൂലൈ 31 വരെയും തിരുവനന്തപരുത്തുനിന്നുള്ള യാത്രക്കാര്‍ക്ക്‌ നവംബര്‍ 16 മുതല്‍ 2010 ജൂലൈ 31 വരെയും ആകര്‍ഷകമായ ഈ കുറഞ്ഞ നിരക്കില്‍ യാത്ര സാധ്യമാണ്‌.                                                                more...

ഇതിനുപുറമെ പ്രൊമോഷണല്‍ സീറ്റുകളും ലഭ്യമായിരിക്കും. ആദ്യം ബുക്ക്‌ചെയ്യുന്നവര്‍ക്ക്‌ ആദ്യം എന്ന മാനദണ്ഡത്തിലായിരിക്കും ഇവ അനുവദിക്കുക.
സാമ്പത്തികമാന്ദ്യത്തെത്തുടര്‍ന്ന്‌ പല എയര്‍ലൈന്‍ കമ്പനികളും സര്‍വ്വീസുകള്‍ വെട്ടിക്കുറയ്‌ക്കുമ്പോഴാണ്‌ എയര്‍ഏഷ്യ പുതിയ കൊച്ചി, തിരുവനന്തപുരം സര്‍വ്വീസുകള്‍ ആരംഭിച്ചിരിക്കുന്നതെന്ന്‌ കമ്പനിയുടെ കൊമേഴ്‌സ്യല്‍ റീജിയണല്‍ ഹെഡ്‌ കത്ത്‌ലീന്‍ ടാന്‍ ചൂണ്ടിക്കാട്ടി. ആകര്‍ഷകമായ ടിക്കറ്റ്‌ നിരക്കുകളും മികച്ച സേവനങ്ങളും വഴി കൂടുതല്‍ പേരെ വിമാനയാത്രയ്‌ക്ക്‌ പ്രേരിപ്പിക്കുകയാണ്‌ ലക്ഷ്യമെന്നും അദ്ദേഹം കൂട്ടിച്ചേര്‍ത്തു.
ദിവസവും ഉച്ചയ്‌ക്ക്‌ശേഷം 2.50നാണ്‌ ക്വാലാലംപൂരില്‍നിന്നും കൊച്ചിയിലേക്കുള്ള എയര്‍ ഏഷ്യാ സര്‍വ്വീസ്‌ ആരംഭിക്കുക. 4.30ന്‌ കൊച്ചിയിലെത്തും. അതേദിവസം അഞ്ചുമണിക്ക്‌ ക്വാലാലംപൂരിലേക്ക്‌ പുറപ്പെടും. തിങ്കള്‍, ബുധന്‍, വ്യാഴം, വെള്ളി, ശനി ദിവസങ്ങളില്‍ ക്വാലാലംപൂരില്‍ നിന്നും 6.20-ന്‌ പുറപ്പെടുന്ന വിമാനം 7.50ന്‌ തിരുവനന്തപുരത്ത്‌ എത്തും. തിരുവനന്തപുരത്തുനിന്നും 8.30 നാണ്‌ ഫ്‌ളൈറ്റ്‌. ചൊവ്വ, ഞായര്‍ ദിവസങ്ങളില്‍ 5.20നായിരിക്കും. ക്വാലാലംപൂരില്‍നിന്നും സര്‍വ്വീസ്‌ ആരംഭിക്കുക. 6.50ന്‌ തിരുവനന്തപുരത്ത്‌ എത്തും. 7.40ന്‌ തിരുവനന്തപുരത്തു നിന്നും പുറപ്പെടും.