മൂന്ന്‌ ബാങ്കുകളില്‍ സര്‍ക്കാര്‍ ഓഹരി ഉയര്‍ത്തുന്നു

മുംബൈ: സ്വകാര്യ വത്‌കരണത്തിന്റെ പാതയില്‍ സഞ്ചരിക്കുമ്പോഴും മൂന്ന്‌ ബാങ്കുകളില്‍ കേന്ദ്രസര്‍ക്കാര്‍ തങ്ങളുടെ ഓഹരി വിഹിതം ഉയര്‍ത്തുന്നു. ബാങ്ക്‌ ഓഫ്‌ ബറോഡ, ഓറിയന്റല്‍ ബാങ്ക്‌ ഓഫ്‌ കൊമേഴ്‌സ്‌, ദേന ബാങ്ക്‌ എന്നിവയിലാണ്‌ സര്‍ക്കാര്‍ വിഹിതം വര്‍ധിപ്പിക്കുന്നത്‌. ഇവയുടെ 10 ശതമാനം വീതം ഓഹരികള്‍ വാങ്ങാനാണ്‌ കേന്ദ്രസര്‍ക്കാര്‍ ലക്ഷ്യമിടുന്നത്‌.
ഇതോടെ മൂന്ന്‌ ബാങ്കുകളിലും സര്‍ക്കാരിന്റെ ഓഹരി 60 ശതമാനത്തിന്‌ മുകളിലാവും. ബാങ്ക്‌ ഓഫ്‌ ബറോഡയിലെ ഓഹരി 54 ല്‍ നിന്ന്‌ 64 ശതമാനമായും ദേന ബാങ്ക്‌, ഓറിയന്റല്‍ ബാങ്ക്‌ ഓഫ്‌ കൊമേഴ്‌സ്‌ എന്നിവയിലെ ഓഹരി 51 ശതമാനത്തില്‍നിന്നും 61 ശതമാനമായും ഉയരും.
നേരിട്ടുള്ള നിക്ഷേപമായിരിക്കും സര്‍ക്കാര്‍ നടത്തുക. 5,000 കോടി മുതല്‍ 6,000 കോടിരൂപവരെയായിരിക്കും ബാങ്ക്‌ ഓഫ്‌ ബറോഡയില്‍ നിക്ഷേപിക്കുക. ഓറിയന്റലിലും ദേനയിലും 1,000 കോടിയുടെ മുതല്‍മുടക്കും സര്‍ക്കാരിന്റെ ഭാഗത്തുനിന്ന്‌ ഉണ്ടായേക്കും.