സംസ്ഥാന സഹകരണ ബാങ്കിന്‌ 20 കോടി ലാഭം

തിരുവനന്തപുരം: സംസ്ഥാന സഹകരണ ബാങ്ക്‌ നടപ്പുവര്‍ഷം 20 കോടി 31 ലക്ഷം രൂപ ലാഭമുണ്ടാക്കി. വരവില്‍ കൂടുതല്‍ ചെലവു വന്നതിനാല്‍ കഴിഞ്ഞ നാലു വര്‍ഷമായി ബാങ്ക്‌ നഷ്ടത്തിലായിരുന്നു. ബാങ്കിന്റെ ലാഭ-നഷ്ട കണക്ക്‌ പരിശോധിക്കുമ്പോള്‍ 49.80 കോടി രൂപയുടെ സഞ്ചിത നഷ്ടമാണ്‌ ഉണ്ടായിരുന്നത്‌. 480.08 കോടി രൂപയുടെ നോണ്‍ പെര്‍ഫോമന്‍സ്‌ അക്കൗണ്ടും ബാങ്കിനുണ്ടായിരുന്നതായി ബാങ്ക്‌ പ്രസിഡന്റ്‌ കോലിയക്കോട്‌ എന്‍ കൃഷ്‌ണന്‍നായര്‍ പത്രസമ്മേളനത്തില്‍ വ്യക്തമാക്കി.
22 ശതമാനമായിരുന്നു ബാങ്കിന്റെ നോണ്‍ പെര്‍ഫോമന്‍സ്‌ അക്കൗണ്ട്‌. ഈ അവസരത്തില്‍ റിസര്‍വ്‌ ബാങ്ക്‌ സംസ്ഥാന സഹകരണ ബാങ്കിന്റെ പ്രവര്‍ത്തനങ്ങള്‍ക്ക്‌ നിയന്ത്രണം ഏര്‍പ്പെടുത്തുകയും നബാര്‍ഡ്‌ കാര്‍ഷിക പുനര്‍വായ്‌പ പൂര്‍ണമായും നിര്‍ത്തലാക്കുകയും ചെയ്‌തിരുന്നു.                                                    more...

തുടര്‍ന്ന്‌ ബാങ്ക്‌ ആക്ഷന്‍ പ്ലാന്‍ തയാറാക്കി പദ്ധതിക്കാലാവധിക്കു മുന്‍പു തന്നെ എന്‍ പി എ (നോണ്‍ പെര്‍ഫോമന്‍സ്‌ അക്കൗണ്ട്‌) 22-ല്‍ നിന്നും 14 ശതമാനമായി കുറച്ചു. ഇതിനായി 142.48 കോടി രൂപ കുടിശിക പിരിച്ചെടുത്തു. തന്‍വര്‍ഷത്തെ ലാഭം ഒരു സര്‍വകാല റെക്കോഡ്‌ ആണെന്ന്‌ നബാര്‍ഡ്‌ തന്നെ സാക്ഷ്യപ്പെടുത്തിയതായും കോലിയക്കോട്‌ കൃഷ്‌ണന്‍ നായര്‍ പറഞ്ഞു. ഇതോടൊപ്പം ബാങ്ക്‌ നടപ്പുവര്‍ഷം ചെലവിനത്തില്‍ 9.11 കോടി രൂപ കുറവു വരുത്തിയിട്ടുണ്ടെന്നും അദ്ദേഹം വ്യക്തമാക്കി.