എയര്‍ ഇന്ത്യയുടെ ശീതകാല ഷെഡ്യൂള്‍ 25 മുതല്‍

ചെന്നൈ: എയര്‍ ഇന്ത്യയുടെ ശീതകാല ഷെഡ്യൂള്‍ ഈമാസം 25 മുതല്‍ പ്രബല്യത്തില്‍ വരും. കൊച്ചി - ബാംഗ്ലൂര്‍ - ചെന്നൈ ട്രയാംഗുലര്‍ സര്‍വീസ്‌ പുതുതായി ആരംഭിക്കും. ചെന്നൈ - മസ്‌കറ്റ്‌ സെക്‌ടറില്‍ നോണ്‍ സ്‌റ്റോപ്പ്‌ സര്‍വീസ്‌ ആരംഭിക്കുന്നതിനൊപ്പം ചെന്നൈ - അഹമ്മദാബാദ്‌, ചെന്നൈ - ഭുവനേശ്വര്‍ സര്‍വീസുകള്‍ പുനരാരംഭിക്കുകയും ചെയ്യും. മുംബൈ വഴിയുള്ള ചെന്നൈ - കുവൈത്ത്‌ സര്‍വീസും ഉണ്ടാകും. ഡല്‍ഹി - ചെന്നൈ സര്‍വീസ്‌ പാരിസ്‌ യാത്രക്കാര്‍ക്കുവേണ്ടി പുനഃക്രമീകരിക്കും. രാവിലെ കൊച്ചി - ബാംഗ്ലൂര്‍ - ചെന്നൈ - കൊച്ചി സര്‍വീസ്‌ നടത്തുന്ന വിമാനം ഉച്ചകഴിഞ്ഞു കൊച്ചി - ചെന്നൈ - ബാംഗ്ലൂര്‍ - കൊച്ചി സര്‍വീസ്‌ നടത്തും. കൊച്ചിയില്‍
നിന്നു രാവിലെ ആറിനു പുറപ്പെട്ട്‌ (ഐസി 509) ബാംഗ്ലൂരില്‍ 7.10 നെത്തും. 7.45 നു ബാംഗ്ലൂര്‍ വിടുന്ന വിമാനം 8.30 നു ചെന്നൈയിലും 9.10 ന്‌ അവിടെ നിന്നു പുറപ്പെട്ട്‌ 10.25നു കൊച്ചിയിലും എത്തും.
ഉച്ചകഴിഞ്ഞു 2.15 നു കൊച്ചിയില്‍ നിന്നു പുറപ്പെട്ട്‌ (ഐസി 511) 3.45 നു ചെന്നൈയിലും അവിടെ നിന്നു 4.25 നു പുറപ്പെട്ട്‌ 5.25 നു ബാംഗ്ലൂരിലുമെത്തും. 6.10 ന്‌ അവിടെ നിന്നു പുറപ്പെട്ട്‌ 7.20 നു കൊച്ചിയില്‍ തിരിച്ചെത്തും.